Misogynie

D Misogüny, wo uf Düütsch öppe Frauefindlechkeit bedüütet, isch en algemeine Begriff für d Meinig, ass Fraue im Verglych zu de Manne weniger wärt selle sy.

Das isch e vilschichtegi Sach vom soziokulturelle Wärtsischteem, wo bi Lüüt cha vorchoo, wo d Möntsche nach Relewanzkriterie tüend ydeile. Me findet so Dänkmuschter i vilne Kultuure und i allne Gselschaftsschichte, und bi Manne und bi Fraue. I de modärne weschtleche Gsellschafte, wo s ofizielle Möntschebild vo der Filosofy vo de algemeine Möntscherächt prägt isch, gilt d Misogüny im Prinzip als faltsches und schlächts Gfüel, und wär die Ystellig i sym Läbe doch agnoo het, tuet se drum meischtens nid offe zeige. Wenn das öpper glych macht so wie verschideni politischi Figuure uf der Wält – es Bischpiil isch der brasilianisch Politiker Jair Bolsonaro – au i der jüngschte Zyt, wird das i der öffentleche Meinig vo teilne als Skandal agluegt.

Misogüny cha sech uf vil Arte manifeschtiere, i der Wirtschaft, oder wemme in ere Gselschaft oder emene Staat de Fraue algemin gwüssi Sache nid erlaubt, i der Politik, dur d Spiilarte vom Sexismus, dur Gwalt gäge Fraue bis hi zum Femizid.

Die erschti, wo über es Bischpiil vo Misogüny gforschet het, isch d Amerikanerin Katharine M. Rogers gsi, wo 1959 i de Texas Studies in Literature and Language undersuecht het, wie das Fänomeen i de Wärch vom Jonathan Swift vorchunt.^[1] S Forschigsfäld verbindet Asätz vo der Soziology, der Sozialpsüchology, der Anthropology, der Gschichtswüsseschaft, der Historische Linguistik und der Wirtschaftswüsseschaft und algemein vo der Gschlächterforschig.

Was d Sproochgschicht agoot, het me ahand vo de früene Wörterbüecher usegfunde, ass bi de Wörter für Fraue vil me negativi Bezeichnige vorchöme als bi dene für d Manne.^[2] D Wortfälder zeigen es Bild vo der ehemolige gselschaftlechi Situazioon, wo d Fraue i vilne Fäll en undergordneti Rolle gspilt händ.

1. ↑ Katharine M. Rogers: "My female friends": The Misogyny of Jonathan Swift. In: Texas Studies in Literature and Language. Vol. 1, No. 3, Herbst 1959, S. 366–379.
2. ↑ Stefan Blankenberger: Das Bild von Mann und Frau in historischen Wörterbüchern des 15.–19. Jahrhunderts. Mainz 2003.